នារសៀលថ្ងៃទី២៣ ខែមករា ឆ្នាំ២០២៥ ឯកឧត្តមបណ្ឌិត ធន់ វឌ្ឍនា អនុប្រធានទី២ព្រឹទ្ធសភា និងជាប្រធានក្រុមសមាជិកព្រឹទ្ធសភាប្រចាំភូមិភាគទី១ បានអញ្ជើញជួបសំណេះសំណាលជាមួយសមាជិកក្រុមប្រឹក្សាសង្កាត់ ស្មៀន នាយប៉ុស្តិ៍នគរបាលរដ្ឋបាល សរុបចំនួន២៦៥ រូបមកពី៤១សង្កាត់ នៃខណ្ឌដូនពេញ ៧មករា ទួលគោក ចំការមន និងបឹងកេងកង។ ពិធីសំណេះសំណាល ត្រូវបានធ្វើឡើង ដើម្បីឈ្វេងយល់ពីបញ្ហាប្រឈម និងសំណូមពរនៅមូលដ្ឋាន។ ក្នុងពិធីនេះ ឯកឧត្តមអនុប្រធានទី២ ព្រឹទ្ធសភា បានគូសបញ្ជាក់អំពី ជោគជ័យនៃការដោះស្រាយបញ្ហាប្រឈម និងសំណូមពរ កន្លងមកដូចជា៖ ១.ក្រសួងមហាផ្ទៃ បានសម្រេចបង្កើនមន្រ្ដីនគរបាលប៉ុស្ដិ៍រដ្ឋបាលឃុំ-សង្កាត់ ឱ្យបានយ៉ាងតិច ១០នាក់ក្នុងឆ្នាំ២០២៥-២០២៦។ ២.ឆ្នាំ២០២៥ រដ្ឋាភិបាលបានទម្លាក់ថវិកាសម្រាប់ការអភិវឌ្ឍមូលដ្ឋាន ជាមធ្យមប្រមាណ១១២០០០ដុល្លារ កើន១០,៩% ប្រៀបធៀបឆ្នាំ២០២៤។ ៣.បញ្ហាអគារសហកម្មសិទ្ធិក្នុងសង្កាត់មនោរម្យ ត្រូវបានដោះស្រាយបញ្ចប់ដោយជោគជ័យ ដោយប្រជាពលរដ្ឋនៅទីនោះប្រមាណ ៦៦គ្រួសារ បានសម្រេចចាកចេញ ក្រោមការសម្របសម្រួលរបស់ក្រសួងរៀបចំដែន ដីនគរូបនីយកម្ម និងសំណង់ ជាមួយអាជ្ញាធរខណ្ឌ៧មករា។
ខ្លឹមសារ៖ ខុទ្ទកាល័យឯកឧត្តមអនុប្រធានទី២ព្រឹទ្ធសភា រូបភាព៖ នាយកដ្ឋានព័ត៌មាន
